«Мы не хочам ніякай вайны». Лукашэнка не бачыць у Польшчы, Літве і Украіне канцэнтрацыі войскаў, здольных уцягнуць Беларусь у вайну

23 лютага 2023 у 1677163080
«Зеркало»

Аляксандр Лукашэнка пакуль не бачыць на тэрыторыі Польшчы, Літвы ці Украіны канцэнтрацыі войскаў, дастатковых для таго, каб уцягнуць Беларусь у вайну. Пра гэта ён заявіў 23 лютага ў інтэрв'ю кітайскім СМІ, піша БЕЛТА.

- Пакуль, як апошнія дні паказалі, ні з тэрыторыі Польшчы, ні з тэрыторыі Літвы, тым больш Украіны канцэнтрацыі войскаў для таго, каб уцягнуць нас у вайну, мы не заўважаем. Мы гэта станоўча ацэньваем, - сказаў Аляксандр Лукашэнка.

Ён таксама чарговым разам папярэдзіў, што ў выпадку агрэсіі ў дачыненні да Беларусі з тэрыторыі Украіны «вайна набудзе зусім іншы характар».

- Мы не хочам ніякай вайны. Тым больш украінцы, людзі, народ украінскі - гэта не чужыя нам людзі. Гэта родныя нам людзі. Нават мае продкі дзесьці там ва Украіне нарадзіліся паміж Чарнігавам і Кіевам. Гэта ўжо з асабістага. Таму мы абсалютна не збіраемся нападаць на Украіну. Але не дай бог з тэрыторыі Украіны будзе здзейсненая агрэсія ў дачыненні да беларускай дзяржавы - мы вымушаныя будзем адказваць. І я ўпэўнены, што тут мы падтрымку атрымаем усёй сусветнай супольнасці, у тым ліку і Кітайскай Народнай Рэспублікі, - падкрэсліў Лукашэнка. - Калі супраць нас будзе здзейсненая агрэсія. Мы гэта даводзім па розных каналах да Украіны, у тым ліку і да Захаду. Я іх папярэдзіў: што не дай бог будзе развязаная агрэсія з тэрыторыі Украіны на тэрыторыю Беларусі - мы адкажам, але гэта будзе зусім іншая вайна. Яна набудзе імгненна іншы характар. І тут мы будзем супраціўляцца і адстойваць нашую зямлю і змагацца з агрэсарам у тым ліку войскамі Расійскай Федэрацыі. Разам.