З 1 траўня ў Беларусі падымуць некаторыя пенсіі. Так, павышэнне закране мінімальныя працоўныя і сацыяльныя пенсіі. Пры гэтым працоўныя пенсіі па ўзросце не будуць павышаць — прынамсі, афіцыйна пра гэта не абвяшчалі. Паглядзелі, якая сітуацыя з планамі ўладаў падняць пенсіі да 40% ад сярэдняга заробку.
Што будзе з сацыяльнымі пенсіямі
Мінімальная пенсія па ўзросце пасля дабаўлення з 1 траўня складзе 115,65 рубля (сума без уліку даплаты ў 20% ад сярэдняй зарплаты). Гэта на 3,74 рубля больш, чым цяпер. Да гэтай сумы прадугледжаная даплата.
Таксама з траўня вырастуць надбаўкі некаторым пенсіянерам. Так, каму ад 75 да 79 гадоў — да 86,74 рубля ў месяц (цяпер — 83,93 рубля), а ад 80 — да 115,65 рубля (цяпер — 111,91 рубля).
Сацыяльная пенсія павялічыцца з 1 траўня да 231,29 рубля. Гэта на 7,47 рубля больш, чым цяпер. Гэтыя выплаты атрымліваюць у тым ліку тыя, хто трапіў у пенсійную пастку.
Што наконт працоўных пенсій па ўзросце
Што да працоўных пенсій па ўзросце, то пра іх павышэнне ўлады не паведамлялі.
Апошні раз іх падымалі з 1 лютага — у сярэднім на 10%. Нагадаем, раней міністр працы і сацыяльнай абароны Наталля Паўлючэнка анансавала, што ў 2025 годзе пенсіі вырастуць на 15%.
Сярэдні памер пенсіі па ўзросце беларуса, які не працуе, у красавіку, як і ў сакавіку, паводле звестак Мінпрацы, склаў 932,24 рубля. Гэта 35,8% ад сярэдняга заробку. Нагадаем, улады не першы год спрабуюць дацягнуць гэты паказчык да 40%, але пакуль не ўдаецца. На гэтую праблему раней звярталі ўвагу афіцыйныя прафсаюзы.
Пры гэтым у студзені — красавіку сярэдні памер пенсіі па ўзросце беларуса, які не працуе, быў на ўзроўні 911,99 рубля. Гэта на 6,75 рубля больш, чым у першым квартале гэтага года.
Чытайце таксама
