У Мінску 10 лютага брыгада медыкаў прыехала, каб забраць 33-гадовага мужчыну і даставіць яго ў бальніцу. Пацыент нечакана напаў на медыкаў з сякерай, расказала «Люстэрку» крыніца ў сталічнай сістэме аховы здароўя. У выніку двое супрацоўнікаў «псіхбрыгады» атрымалі сур’ёзныя траўмы.
Выклік паступіў днём у суботу, 10 лютага. Спецыяльнай брыгадзе па перавозцы пацыентаў з псіхічнымі парушэннямі гарадской станцыі хуткай медыцынскай дапамогі трэба было забраць 33-гадовага мужчыну, які жыве з бацькам у адным з прыватных дамоў на вуліцы Пржэвальскага. Даставіць яго неабходна было ў РНПЦ псіхічнага здароўя ў Навінках. Раней на гэты адрас спецыяльныя брыгады ўжо ездзілі.
«Прасілі бацьку: калі вы яшчэ раз будзеце выклікаць брыгаду — выклікайце міліцыю. Бо ў вас вельмі агрэсіўны сын. Але ўсім заўсёды ўсё роўна. Хоць на раёне выязджае з брыгадай супрацоўнік міліцыі. А ў Мінску ўсім нібы напляваць», — расказаў суразмоўца.
У дом зайшлі двое — 42-гадовы фельчар, старшы брыгады, і 30-гадовы фельчар. Пацыент у гэты час ляжаў. Яго папрасілі ўстаць, ён паслухаўся і пайшоў.
Пазней старшы брыгады пачуў, што ззаду нешта ўпала. Павярнуўшыся, ён убачыў свайго малодшага напарніка, што ляжаў у крыві. Побач быў пацыент з сякерай. Пакуль старшы брыгады выцягваў пацярпелага калегу, мужчына біў яго па галаве сякерай. Пасля яны хутка з’ехалі ў бальніцу. 30-гадовы фельчар на той момант быў «мутны» і ледзь стаяў на нагах.
Падчас нападу 33-гадовы мужчына, якога мусілі даставіць у РНПЦ, парэзаў палец. Пазней бацька пацыента выклікаў яшчэ адну брыгаду хуткай, якая прыехала ўжо з міліцыяй.
Паводле крыніцы, у 30-гадовага фельчара — аскепкавы пералом чэрапа. У яго старэйшага таварыша таксама пералом костак чэрапа. Службовая машына хуткай дапамогі была ў крыві, і там былі відаць скрываўленыя кавалкі костак. Стан абодвух пацярпелых — сярэдняй ступені цяжкасці.
Як расказалі «Люстэрку», загадчык падстанцыі № 1, да якой адносіцца брыгада «псіхперавозкі», вырашыў не наведваць пацярпелых.
«Цяпер абодва фельчары шпіталізаваныя ў сталічную бальніцу. У пацярпелых медыцынскіх работнікаў дыягнаставаныя спалучаныя траўмы. Агульны стан расцэньваецца як сярэдняй ступені цяжкасці, праводзіцца ўсё неабходнае лячэнне», — паведамілі ў Мінздароўя.
Пазней у неафіцыйным тэлеграм-канале МУС з’явілася фота сякеры і падрабязнасці з нашай нататкі. Акрамя таго, паведамляецца, што «супрацоўнікі даставілі хворага ў райаддзел для разбіральніцтва». Пазней яго транспартавалі ў РНПЦ псіхічнага здароўя.