Словазлучэнне «зямля сышла з-пад ног» звычайна выкарыстоўваюць, апісваючы непрыемныя эпізоды з жыцця, калі чалавек аказваецца ў ненадзейным становішчы. Але зямля можа сысці з-пад ног і ў прамым сэнсе. У аграрнай частцы Турцыі апошнім часам сталі ўсё часцей з’яўляцца карставыя варонкі — правалы ў зямлі. Асабліва моцна гэтая праблема закранае правінцыю Конья — сельскагаспадарчую жытніцу краіны. Паглядзіце, як у Турцыі з’яўляюцца шматлікія правалы ў зямлі.
Такія варонкі могуць з’яўляцца дзе і калі заўгодна. Сама па сабе з’ява не ўнікальная, але вось колькасць новых правалаў, якія з’явіліся ў адным рэгіёне Турцыі апошнім часам, турбуе насельніцтва краіны, якая летась перажыла адзін з самых смяротных на планеце землятрусаў. Гэтым летам турэцкае агенцтва па надзвычайных сітуацыях выявіла больш за 2700 паверхневых дэфармацый і несейсмічных расколін, якія сведчаць пра рызыку ўтварэння новых варонак.
Карставыя варонкі ўзнікаюць там, дзе вада растварае пароду (часцей за ўсё вапняк) пад паверхняй, — там з’яўляюцца пустоты, а потым верхні пласт абвальваецца. Правалы могуць утварацца натуральным шляхам ці з антрапагенных прычын — то-бок у выніку прамога ці ўскоснага ўздзеяння людзей.
На думку экспертаў, колькасць новых варонак у Турцыі расце праз узмацненне засухі і празмернае выкарыстанне грунтовых водаў для арашэння. Узімку ў Коньі зафіксавалі на 40% ападкаў менш, чым у сярэднім, што аказала яшчэ большы ціск на мясцовых фермераў (рэгіён вырабляе 36% пшаніцы і 35% буракоў у Турцыі). Некаторыя спрабавалі вырашыць свае праблемы з вадой шляхам незаконных свідравін, тым самым яшчэ больш аслабляючы падземную пароду.
Між тым некаторыя прадпрымальнікі ператварылі праблему з карставымі варонкамі ў магчымасць зарабіць. Прадпрымальнік Джэм Кынай адкрыў раскошны гатэль на 13 нумароў у 800-гадовым сельджукскім караван-сараі (старажытнай прыдарожнай гасцініцы), размешчаным на краі найстарэйшай і самай вядомай варонкі ў Турцыі — Кызорэн.
