Сем так званых харугваў у Польшчы рыхтуюцца да захопу аб’ектаў і тэрактаў у Беларусі. Пра гэта ў гутарцы з журналістамі заявіў старшыня Камітэта дзяржаўнай бяспекі Іван Тэртэль, перадае БЕЛТА.
«На тэрыторыі Польшчы ў цяперашні час сем так званых харугваў рыхтуюцца да тэрактаў і захопу аб’ектаў на беларускай тэрыторыі. Самая агрэсіўная харугва трэніруецца ў Беластоку на вуліцы кардынала Вышынскага, 6а. Ёю кіруе наш грамадзянін Асадулаеў 1991 года нараджэння, які калісьці вучыўся ў Вайсковай акадэміі і ўцёк за мяжу. Ён хаваецца пад псеўданімам Шляхціц. Гэта адна з найбольш агрэсіўных структур», — сказаў Іван Тэртэль.
Старшыня КДБ запэўніў, што вядомыя імёны супрацоўнікаў польскіх спецслужбаў, якія курыруюць дзейнасць гэтых харугваў. «Мы лічым гэта недапушчальным. Мы такую практыку не выкарыстоўваем і не лічым, што гэта добра. Украінскія, польскія, прыбалтыйскія калегі павінныя сачыць, каб гэтая зброя не павярнулася супраць іх. Мы неаднаразова атрымлівалі інфармацыю, што гэтая публіка хацела б здзейсніць правакацыі з выкарыстаннем метадаў 1939 года. Мы памятаем, з чаго пачыналася Другая сусветная вайна — з правакацыі немцаў з выкарыстаннем польскай формы адзення», — падкрэсліў Іван Тэртэль.
Ён папярэдзіў польскіх, украінскіх і прыбалтыйскіх калег, што гэта зброя, якая не паддаецца кантролю, якая можа быць павернутая супраць куратараў. «Гэта было неаднаразова. Мы ведаем сітуацыю з ІДІЛ і гісторыю іх узаемаадносін з амерыканскімі спецслужбамі. І нашыя замежныя калегі могуць дабіцца такіх самых адмоўных вынікаў для сябе», — лічыць Іван Тэртэль.