Больш за пяцьсот журналістаў па ўсім свеце сустрэнуць Новы год у зняволенні, гаворыцца ў справаздачы міжнароднай арганізацыі «Рэпарцёры без межаў». Беларусь займае трэцяе месца ў свеце па колькасці работнікаў медыя за кратамі.
З 2022 па 2023 год амаль на 9% скарацілася колькасць адвольна затрыманых журналістаў, аднак у 2024 годзе за кратамі застанецца 521 журналіст, у 2022 годзе іх было 569. Больш чым палова зняволеных журналістаў прыпадае на Кітай (уключаючы Ганконг), М’янму, Беларусь і В’етнам.
«У 2023 годзе Беларусь Аляксандра Лукашэнкі ўваходзіць у тройку рэжымаў, якія больш за ўсё асуджаюць журналістаў: за кратамі знаходзяцца 39 чалавек (на сем больш, чым у 2022 годзе). Беларусь — краіна з найбольшай колькасцю затрыманых журналістак (10) пасля Кітая (14)», — гаворыцца ў справаздачы.
Кітай зноў стаў «найбуйнейшай у свеце турмой» для журналістаў: за кратамі знаходзіцца 121 работнік СМІ. Амаль чвэрць (23%) журналістаў, затрыманых ва ўсім свеце, цяпер у кітайскіх турмах. У М’янме ў 2023 годзе па-ранейшаму знаходзяцца ў зняволенні 68 журналістаў у параўнанні з 78 у 2022 годзе. Палова з іх — у чаканні суда.
З 521 журналіста, затрыманага па ўсім свеце, больш чым палова (296) усё яшчэ чакае суда.
У справаздачы таксама адзначаецца, што з пачатку года падчас сваёй працы ў свеце забітыя 45 журналістаў, у тым ліку 13 — на Блізкім Усходзе.
На 1 снежня ў закладніках знаходзіліся 54 журналісты, больш чым палова з іх — у Сірыі (38). Таксама ў спісе Ірак (9), Емен (4), Малі (2) і Мексіка (1).
Яшчэ 84 журналісты лічацца зніклымі без вестак, крыху больш чым палова з іх (43) прыпадае на краіны Лацінскай Амерыкі, 31 з іх — у Мексіцы, у якой амаль усе знікненні, за выключэннем аднаго, адбыліся да 2023 года.