Улады збіраюцца «самым бескампрамісным чынам навесці парадак ва ўніверсітэтах». Пра гэта заявіў Аляксандр Лукашэнка на Рэспубліканскім педагагічным савеце, перадае БЕЛТА.
— Міністр далажыў пра вынікі праверкі дзейнасці ВНУ і рэктараў, праведзенай на маё даручэнне. Але я вам скажу, што гэта толькі пачатак і адседзецца нікому не атрымаецца. Мы збіраемся самым бескампрамісным чынам навесці парадак ва ўніверсітэтах, — папярэдзіў Аляксандр Лукашэнка.
Палітык таксама даручыў разабрацца з мэтавымі напрамкамі.
— Здаецца, сістэма ёсць, але належнай празрыстасці і эфектыўнасці няма, — заявіў Лукашэнка.
Ён нагадаў, што на лютаўскай сустрэчы з рэктарамі гаварыў пра неабходнасць перагледзець пералік спецыяльнасцяў у адпаведнасці з патрэбамі эканомікі, абнаўлення навучальных праграм, узмацнення практычнага складніка навучання.
— Я не разумею, чаму ўчорашняга дыпламаванага выпускніка трэба давучваць? Хто ў гэтым вінаваты? ВНУ, якая не дае патрэбных ведаў, ці працадаўца, які не жадае дапамагаць у адаптацыі на першым працоўным месцы? Што гэта такое? — сказаў палітык, падкрэсліўшы, што такое ў сучасных умовах, калі прадпрыемствы маюць патрэбу ў падрыхтаваных кадрах, недазваляльная раскоша.
Абмяркоўваючы сістэму сярэдняй адукацыі, палітык прапанаваў адрадзіць працоўную практыку для школьнікаў.
— Няхай яны (школьнікі. — Заўв. рэд.) убачаць, наколькі сёння ступіла наперад сфера рэальнай вытворчасці, заснаванай на сучасных тэхналогіях. Хай паглядзяць на спецыялістаў, якія там працуюць, пагутараць з імі. Пазнаёмяцца з умовамі працы, сучаснай тэхнікай і абсталяваннем, на якім яны працуюць. Гэта будзе найлепшая прафарыентацыя, — перакананы Лукашэнка.