Прадукты працягваюць лідзіраваць у росце цэн. За апошні год — у кастрычніку ў параўнанні з аналагічным месяцам 2023-га — у сярэднім яны падаражэлі на 7,2%, але ў некаторых выпадках — больш прыкметна. Расказваем, што за гэты перыяд стала менш даступным, а што, наадварот, патаннела.
У той час як гадавая інфляцыя ў кастрычніку склала 5,9%, прадукты харчавання сталі даражэйшыя ў сярэднім на 7,2%. Дзяржрэгуляванне, відаць, не дапамагае стрымаць цэны на некаторыя прадукты — у выніку іх цана за год вырасла на дзясяткі працэнтаў.
Параўнанне цэн паводле Белстата ў кастрычніку гэтага года з тым жа месяцам мінулага паказвае, што за гэты час больш за ўсё падаражэў аліўкавы алей — на 63,5%. Следам за ім ідзе бульба, якая ў кастрычніку каштавала на 62% больш, чым за год да таго. Нагадаем, раней улады ўвялі на гэты тавар «столь» па рознічных цэнах.
З гародніны і садавіны вылучаецца таксама перац, які вырас у цане на 31%. Больш чым на чвэрць падаражэла белакачанная капуста, амаль на столькі ж — буракі. Агуркі і памідоры за год сталі даражэйшыя на 13,6% і 7,4% адпаведна.
Да прыкладу, малако за апошні год у сярэднім падаражэла на 7,1%, а кефір — на 3,2%. Што да мяса, то свініна (акрамя бескасцёвай) за гэты перыяд дадала ў цане 43,6%, курыца — 4,3%. Хлеб за год падаражэў на 9,6%, а курыныя яйкі — на 8,9%.
У некаторых выпадках прадукты патаннелі. Гэта грэчка (на 16%), рыбныя кансервы, якія ў залежнасці ад віду сталі на 9 і на 12% больш даступнымі. Патаннелі таксама кансервы для дзіцячага харчавання: мясныя — на 1,1%, а агароднінныя і фруктовыя — на 3,2%.
Чытайце таксама
