На электронным аўкцыёне «БелЮрЗабяспечанне» 20 лістапада збіраліся прадаваць чарговую нерухомасць Валерыя Цапкалы. Гэтым разам на таргі выстаўлялі яго дом у Мінску. У выніку аўкцыён не адбыўся: не знайшлося ахвочых купіць гэтую нерухомасць.
На таргі выстаўлялі двухпавярховы дом № 7 на вуліцы Цяплічнай у Мінску. Разам з ім прадаваўся зямельны ўчастак на 0,1411 га, складовыя часткі дома, абсталяванне і прадметы інтэр'еру. Агульная плошча будынка — 418,3 м².
Пачатковы кошт маёмасці складаў 2 104 000 рублей.
У абвестцы адзначалася, што нерухомасць пад арыштам, суд забараніў ажыццяўляць па ёй рэгістрацыйныя дзеянні. У доме зарэгістраваныя тры чалавекі, у тым ліку двое няпоўнагадовых дзяцей. Даўжніком запісаны Цапкала Валерый Вільямавіч, ён жа — уладальнік маёмасці.
Пра незаконную канфіскацыю жылля праўладнымі структурамі «Люстэрку» ўжо расказвала Крысціна Рыхтэр, экс-дарадца Святланы Ціханоўскай па юрыдычных пытаннях. У дадатку да Закона «Пра выканаўчую вытворчасць» ёсць пералік маёмасці, якая не можа быць канфіскаваная. У яго першым пункце выразна сказана, што нельга забраць жыллё, у якім пастаянна жыве даўжнік ці яго сям’я. Аднак улады канфіскавалі і прадалі на аўкцыёне кватэры Ціханоўскіх і Цапкалаў, хоць у іх былі зарэгістраваныя няпоўнагадовыя дзеці палітыкаў. То-бок канфіскацыю нерухомай маёмасці ажыццявілі незаконна.
Нагадаем, Валерый Цапкала ў мінулым кіраваў беларускім Паркам высокіх тэхналогій. Для ўдзелу ў прэзідэнцкай кампаніі 2020 года ён сабраў ініцыятыўную групу, ездзіў па краіне. Аднак ЦВК адмовіў яму ў рэгістрацыі праз тое, што сабраных подпісаў пасля праверкі аказалася менш за сто тысяч. Калі палітыка не дапусцілі да ўдзелу ў выбарах, яго жонка Вераніка далучылася да аб’яднанага штаба Святланы Ціханоўскай.
Валерый Цапкала пакінуў краіну ў ліпені 2020 года, баючыся пераследу. 9 жніўня з Беларусі з’ехала і Вераніка. Сям’я Цапкалаў асталявалася ў Латвіі.
На радзіме Валерыя Цапкалу завочна асудзілі на 17 гадоў калоніі ўзмоцненага рэжыму.
Летам 2022 года дом сям'і Цапкалаў на вуліцы Цяплічнай быў разгромлены невядомымі. Як паведаміла Веранікі Цапкала, у жытле выбілі вонкавыя дзверы, разбілі вокны, зламалі мэблю, разбілі посуд, плітку, сантэхніку.
У красавіку гэтага года на таргах была прададзеная трохпакаёвая кватэра з машына-месцам, якая належыць сям'і Цапкалаў. Нерухомасць набылі за 395 720,27 рублі.
Жонка Валерыя Цапкалы адзначала раней, што нерухомасць належыць не толькі яе мужу, але і ёй і іх няпоўнагадовым дзецям. На яе думку, рашэннем выставіць на таргі нерухомасць парушаецца ў тым ліку Канстытуцыя. Жанчына заклікала Следчы камітэт і пракуратуру правесці расследаванне з нагоды продажу нерухомасці.
Нагадаем, у пачатку красавіка 2024 года стала вядома, што ў Мінску суд Партызанскага раёна прызнаў нікчэмнай угоду па адчуджэнні жылога дома, гэтага дабівалася пракуратура. Прэтэнзіі ўзніклі да мінчука, які ў 2020 годзе перадаў жыллё лізінгавай кампаніі за 280 тысяч рублёў, але жыў у ім далей, аформіўшы дамову арэнды. Пракуратура палічыла, што сума ўгоды моцна заніжаная, а мужчына пазбавіўся ад жылля, каб яго не адабрала дзяржава. Пра каго канкрэтна ідзе гаворка, не раскрывалася. Аднак з паведамлення пракуратуры можна было зрабіць выснову, што, хутчэй за ўсё, гісторыя пра дом сям'і Цапкалаў — Валерыя і Веранікі.
Чытайце таксама
