Літва з 1 студзеня 2025 года ўвядзе новыя санкцыі супраць Беларусі. Пра гэта паведамляе прэс-служба мытні гэтай краіны. Гаворка пра абмежаванні, якія ў пачатку снежня прыняў літоўскі ўрад.
Літва з 1 студзеня абновіць спіс тавараў падвойнага прызначэння, увоз якіх абмежаваны для вывазу ў Беларусь і Расію. Гаворка менавіта пра нацыянальныя санкцыі, якія ўвяла гэтая суседняя краіна.
Так, у гэты пералік уключылі цэнтрыфугі, машыны і апараты для фільтрацыі ці ачысткі вадкасцяў або газаў, розныя кампаненты транспартных сродкаў, такія як трансмісійныя валы, падшыпнікі, счапленні, скрынкі перадач, запчасткі, а таксама дарожныя трактары і іншыя тавары.
Таксама ўрад Літвы выключыў з нацыянальнага пераліку тавары, якія ўключаныя ў санкцыйны спіс ЕС.
Як плануецца, гэтыя абмежаванні будуць дзейнічаць да 2 студзеня 2026 года.
Нагадаем, Літва з 3 ліпеня 2023 года ўвяла абмежаванні па таварах, якія ідуць праз яе тэрыторыю ў Беларусь і Расію. Тады пад абмежаванні транзіту трапіла прадукцыя, якая выкарыстоўваецца «ў ваенных мэтах або для павелічэння магутнасцяў расійскай прамысловасці», — на яе трэба падаваць дэкларацыі вытворцы.
Напярэдадні стала вядома, што Літва плануе падоўжыць нацыянальныя санкцыі супраць расіян і беларусаў яшчэ на год праз вайну, якую Расія вядзе ва Украіне. Гэта прадугледжваецца папраўкай да закона, распрацаванай Міністэрствам замежных справаў Літвы.
Чытайце таксама
