Перад самітам ЕС дэпутаты партыі «Вольт Еўропа» прапанавалі пакараць Венгрыю за нязгоду з курсам аб’яднання, пазбавіўшы яе права голасу. Акрамя таго, у іх плане — узмацненне паўнамоцтваў Брусэля ў сферы абароны і прызначэнне Каі Калас «паўнапраўным міністрам замежных справаў» ЕС, паведамляе Politico.
Еўрапарламент рыхтуецца да абмеркавання жорсткіх мераў супраць Венгрыі, якая не падтрымала вылучэнне 20 млрд еўра ваеннай дапамогі Украіне. Паводле звестак выдання, партыя «Вольт Еўропа» прапануе пакараць Будапешт, пазбавіўшы яго права голасу ў ЕС.
Акрамя таго, партыя выступіла з ініцыятывай стварэння агульнай еўрапейскай арміі і ўзмацнення замежнапалітычнай ролі Еўрасаюза. У прыватнасці, прапануецца прызначыць Каю Калас на пасаду міністра замежных справаў ЕС з пашыранымі паўнамоцтвамі.
«Вольт Еўропа» пазіцыянуе сябе як прыхільніца паглыбленай інтэграцыі і лічыць, што інтарэсы ўсяго кантынента павінныя стаяць вышэй за нацыянальныя інтарэсы асобных дзяржаваў. У новым складзе Еўрапарламента партыя атрымала пяць мандатаў і далучылася да фракцыі «Зялёных».
Прапанова можа быць разгледжаная на саміце ЕС 6 сакавіка. Аднак на гэты момант у парадку дня няма пытання пра новы пакет ваеннай дапамогі Украіне, бо яго абмеркаванне заблакаванае Венгрыяй.