Па справе пра ДТЗ пад Смалявічамі прызначаная вялікая колькасць экспертызаў, заявіў міністр унутраных справаў Беларусі Іван Кубракоў, піша Sputnik.
«Цяпер высвятляюцца ўсе прычыны, якія спрыялі дадзенаму ДТЗ. Сказаць, хто вінаваты, хто мае рацыю, у гэты момант не магу, таму што будзе праводзіцца вельмі вялікая колькасць экспертызаў, якія адкажуць на ўсе пытанні», — заявіў Кубракоў.
Ён таксама адзначыў, што па гэтым ДТЗ «шмат пытанняў».
«На сённяшні момант многія задаюць пытанні, магчыма, праз пэўны стыль язды часам кіроўцамі маршрутных таксі. Папярэдне, гэта вельмі папярэдне, — хуткасны рэжым кіроўцамі не парушаўся. Што спрыяла менавіта такому лабавому сутыкненню, яшчэ трэба разабрацца», — сказаў ён.
«Усе адказы на пытанні, вядома, дасць тэхнічная экспертыза. Таму што вельмі шмат пытанняў па дадзеным ДТЗ», — сказаў міністр.
Па яго словах, паводле папярэдняй інфармацыі, у маршруткі, якая трапіла ў ДТЗ, тэхагляд быў пройдзены своечасова.
Міністр адзначыў, што не памятае ДТЗ з такой колькасцю загінулых у апошнія гады.
Нагадаем, 20 лютага ў Смалявіцкім раёне сутыкнуліся гружаны пяском МАЗ і маршрутнае таксі. У ДТЗ загінулі 11 чалавек.