Пытанне размеркавання выпускнікоў сярэдніх спецыяльных і вышэйшых навучальных установаў абмеркаваў Аляксандр Лукашэнка з міністрам адукацыі Андрэем Іванцом на нарадзе 21 верасня.
Кіраўнік Мінадукацыі падкрэсліў, што яго ведамства кантралюе пытанні абавязковай адпрацоўкі бюджэтнікаў. Пры гэтым адзначыў, што ёсць «адзінкавыя выпадкі», калі выпускнікі адмаўляюцца ад размеркавання і кампенсуюць кошт навучання.
— Сёння і бюджэтнік, і платнік, на нашую думку, мусіць адпрацоўваць. Адпаведныя змены рыхтуем для ўнясення змяненняў у Кодэкс Рэспублікі Беларусь аб адукацыі, — заявіў міністр.
Іванец нагадаў, што выпускнікі дзённай формы навучання на бюджэце адпрацоўваюць два гады, мэтавікі — не менш за пяць гадоў. Лукашэнка падкрэсліў, што лічыць гэта недастатковым.
— Непрымальна для краіны, калі спецыялісты з’язджаюць за мяжу, а мы так спакойна да гэтага ставімся. ВНУ скончыў, два гады адпрацаваў. Што такое два гады?! Гэта, лічыце, мы яго вучылі ў ВНУ і яшчэ праз настаўніцтва досвед набывае. Мы яго вучым два гады на працы, у школе, дапусцім, калі гэта настаўнік. І ён (настаўнік. — Заўв. рэд.) ці медык з’язджае. Лічу, што тут павінныя дзейнічаць забаронныя меры. <…> Ну, хаця б паўзабаронныя. Дапусцім, пяць гадоў. Правільна, мэтавік — не менш за пяць гадоў. А можа, яшчэ і арыентаваць дзесьці акуратна, да сямі гадоў. У адваротным выпадку не хадзі ў мэтавікі, — сказаў палітык.
У размеркаванні платнікаў Лукашэнка таксама не бачыць ніякіх супярэчнасцяў. Беларуская вышэйшая адукацыя каштуе даражэй, чым плацяць студэнты.
— Я параўноўваю з узроўнем аплаты там, на Захадзе. Там шалёныя грошы гэта каштуе. Таму ладна, плацім столькі, добра — адпрацуйце.
Міністр Іванец пацвердзіў: «Сёння ў нас платнік кампенсуе не больш чым 50−70% кошту свайго навучання».
— Фактычна ў нас сёння ў рэспубліцы няма платнай адукацыі. Гэта паўплатная адукацыя, якую субсідыюе дзяржава, — заявіў кіраўнік Мінадукацыі.
Нагадаем, 16 лістапада старшыня Савета Рэспублікі Наталля Качанава заявіла: «Міністэрству адукацыі, ВНУ пастаўленая задача — размяркоўваць не толькі тых, хто вучыўся на бюджэтнай аснове, а размяркоўваць усіх». Тады ў Мінадукацыі паведамілі, што на гэты момант у Кодэксе аб адукацыі абавязковае размеркаванне для платнікаў не прадугледжанае, а на пытанне, ці плануецца нешта такое, адказалі, што «пакуль даручэнняў не было».
Чытайце таксама
