Гомельскі абласны суд 6 лютага пачаў разглядаць справу трох мясцовых жыхароў, якіх абвінавацілі па некалькіх «палітычных» артыкулах, паведамляе «Флагшток».
Працэс праходзіць у закрытым рэжыме. Абвінавачаныя — Дзмітрый Папкоў, Ігар Чарнавусаў, Уладзімір Каменаў — ужо амаль год знаходзяцца пад вартай. Іх і яшчэ аднаго гамяльчаніна жорстка затрымалі ў сакавіку 2023 года. Тады сілавікі заявілі, што падчас адпрацоўкі гаражнага кааператыву раскрылі «злачынную групу», якая збіралася ў гаражы, і назвалі хлопцаў «спящей ячейкой экстремистов».
У гаражы нічога не знайшлі, акрамя забароненай уладамі сімволікі (БЧБ-сцяг, намаляваны на цагліне герб «Пагоня»), але заявілі, што затрыманыя нібыта «выношвалі планы па дэстабілізацыі абстаноўкі ў Беларусі», «распальвалі варожасць у інтэрнэце» і «мелі замежныя сувязі з тэрарыстычнай арганізацыяй» (размаўлялі з добраахвотнікамі, якія ваююць на баку Украіны).
Пазней сілавікі апублікавалі «пакаяльнае» відэа з затрыманымі, у якім прымусілі сказаць, што хлопцы стварылі чат, дзе перапісваліся паміж сабой, а пасля нападу Расіі на Украіну нібыта некалькі разоў у перапісках абразілі Лукашэнку, акрамя таго, яны пісалі «няправільныя» каментары.
Іх абвінавацілі ў спрыянні «экстрэмісцкай» дзейнасці, стварэнні «экстрэмісцкага фарміравання» альбо ўдзеле ў ім і ў абразе Лукашэнкі.
Судзяць трох затрыманых, пра чацвёртага пакуль няма інфармацыі.