Полк Каліноўскага прапануе ўнесці экстрадыяванага ў Беларусь былога каліноўца Васіля Верамейчыка ў абменны фонд і пры першай магчымасці абмяняць яго на расіян. Пра гэта гаворыцца ў заяве палка, апублікаванай у неафіцыйным тэлеграм-канале. Пазней выявілася, што гэта тэлеграм-канал часткі палка Каліноўскага, што адкалолася ад асноўнага складу.
«Полк імя Кастуся Каліноўскага заклікае ўнесці былога байца ў абменны фонд і разам з іншымі палоннымі каліноўцамі пры першай магчымасці абмяняць на палонных расійскіх вайсковаслужбоўцаў», — гаворыцца ў заяве.
Байцы заяўляюць, што не ведаюць, ці было затрыманне Верамейчыка ў В’етнаме і экстрадыцыя ў Беларусь спецаперацыяй КДБ.
«Ці была гэта спецаперацыя КДБ — невядома, але падзея паказвае, што рэжым з асаблівым „піетэтам“ ставіцца да тых былых вайскоўцаў Узброеных сіл Беларусі, якія выбралі бок дабра. Хаця пад вялікай пагрозай знаходзяцца ўсе добраахвотнікі без выключэння. Таму, да моманту перамогі, Украіна з’яўляецца самай бяспечнай краінай для легіянераў», — адзначылі каліноўцы.
Там таксама пракаментавалі інфармацыю ў СМІ пра тое, што Галоўнае ўпраўленне выведкі Мінабароны Украіны нібыта забараніла Верамейчыку ўезд ва Украіну на просьбу штаба палка.
«Разам з тым варта адзначыць, што забароны на ўезд ва Украіну ад ГУР, як пішуць некаторыя медыя, для добраахвотнікаў не існуе. Гэтыя пытанні знаходзяцца ў кампетэнцыі СБУ і памежнай службы Украіны», — заяўляюць беларускія добраахвотнікі.
Пазней заяву з нагоды Верамейчыка апублікаваў і афіцыйны тэлеграм-канал палка Каліноўскага.
«Полк Кастуся Каліноўскага не каментуе справу Васіля Верамейчыка. Мы разумеем складанасць сітуацыі і знаходзімся ў кантакце з усімі кампетэнтнымі органамі, якія займаюцца гэтай справай. Любыя іншыя заявы пра Васіля Верамейчыка ад імя Палка Каліноўскага не адлюстроўваюць нашую пазіцыю і не адпавядаюць рэчаіснасці. Усе нашы рэсурсы пазначаны на нашым афіцыйным сайце kalinouski.org», — гаворыцца ў заяве.
Нагадаем, напярэдадні стала вядома, што затрыманага ў Азіі экс-байца палка Каліноўскага выдалі Беларусі. КДБ назваў яго імя — Васіль Верамейчык і паказаў відэа. Раней «Люстэрка» паведамляла пра затрыманне ў адной з краін Паўднёва-Усходняй Азіі мужчыны, што служыў у беларускім добраахвотніцкім фарміраванні. Мы не называлі яго імені і краіны затрымання па просьбе сяброў, якія баяліся яго экстрадыцыі.
Чытайце таксама
