У памежных чатах перад Новым годам пішуць пра вялікія чэргі на расійска-беларускай мяжы. У прыватнасці, людзі скардзяцца, што прастойваюць гадзінамі на памежным пераходзе «Лабок» (з беларускага боку — «Езярышча»). У самім пункце пропуску патлумачылі тое, што адбываецца, вялікім патокам аўто з боку РФ і параілі прыязджаць на мяжу з раніцы.
Паведамленні пра чэргі на ўезд у Беларусь на расійскім памежным пераходзе «Лабок» пачалі з’яўляцца ў чатах на мінулых выходных.
«„Лабок“ ужо захрас. Мінімум чатыры гадзіны», — напісаў адзін пасажыр днём у нядзелю, 29 снежня.
- «Затор да канца вёскі ў два шэрагі».
- «Рухаемся вельмі павольна».
- «Шмат машын, у чарзе ўжо 2,5 гадзіны, і пачатку не відаць у бок РБ».
- «У мяне ўжо пятая гадзіна стаяння тут пачалася. А яшчэ чорт ведае колькі ехаць. Прыбіральні няма, ды і я адзін кіроўца, куды мне з машыны. Кавярні няма. Хоць бы кавы папіць».
Адна жанчына напісала, што ў нядзелю «ў „Лабку“ прастаялі больш за чатыры гадзіны з 17.40 і да 22.00». Мяркуючы з паведамленняў, падобная сітуацыя была і ўвечары ў панядзелак.
У іншых пунктах пропуску на расійска-беларускай мяжы сітуацыя не такая напружаная, адзначаюць пасажыры: паводле водгукаў, праз «Доласцы» мяжу праходзілі за 10 хвілін, праз «Байдакова» — за 40 хвілін, праз «Сянькова» — за 20 хвілін.
Карыстальнікі чатаў тлумачаць вялікія чэргі ў Беларусь наплывам расіян, якія імкнуцца ў нашую краіну на святы.
«У кагосьці сваякі, а нехта з даўгамі ФССП (Расійскай федэральнай службы судовых прыставаў. — Заўв. рэд.) ляціць адпачываць на навагоднія вакацыі за мяжу», — дапусціў яшчэ адзін каментатар.
Журналістка «Люстэрка» патэлефанавала ў пункт пропуску «Лабок» як звычайная беларуска, якая напярэдадні Новага года хоча з Масквы паехаць на радзіму і непакоіцца, як бы не захраснуць у заторы на мяжы.
Дзяжурны выязной памежнай службы расказаў, што для гэтага трэба было выехаць з Масквы «яшчэ ўначы»: раніцай 31 снежня чаргі на памежным пераходзе практычна няма — стаіць усяго некалькі машын, аднак да вечара чакаецца новы «раўнд напружанкі».
— Учора ўвечары было і праўда цяжка. Сёння таксама выбудуюцца [у чаргу]. А калі б выехалі [з Масквы] ноччу, [раніцай] хутка праскочылі б, — расказалі ў пункце пропуску.
У «Лабку» патлумачылі заторы тым, што праз гэты пункт пропуску праходзіць аўтамабільная дарога федэральнага значэння Р23 Санкт-Пецярбург — Пскоў — Пустошка — Невель — мяжа з Беларуссю (на беларускім баку яна «ператвараецца» ў М8). Таму памежны пераход прымае на сябе ажыўленыя патокі аўтамабіляў, у прыватнасці, з боку Санкт-Пецярбурга і Ленінградскай вобласці.
— Усе чамусьці сюды едуць, — расказаў дзяжурны памежнік.
Паводле яго, такая сітуацыя на расійска-беларускай мяжы ўзнікае пераважна на святы — у будні там адносна свабодна.
Каб не захраснуць у заторы, ён параіў перасякаць мяжу праз менш загружаныя пункты пропуску — напрыклад, тыя ж «Доласцы».
Адзначым, што афармленне аўтамабіляў на расійска-беларускай мяжы праходзіць толькі ў пунктах пропуску РФ: з беларускага боку памежнага і мытнага кантролю няма.
Чытайце таксама
