УСУ змаглі захапіць некалькі населеных пунктаў Данецкай вобласці і рухаюцца ў бок Малочнага лімана (Запарожская вобласць. — Заўв. рэд.). Пра гэта заявіў кіраўнік ПВК Вагнера Яўген Прыгожын, адказваючы на пытанне пра ход украінскага контрнаступлення.
— У нас Пяціхаткі пад праціўнікам, паўночная частка Рабоціна — пад праціўнікам, Ураджайнае — пад праціўнікам. І гэта сведчыць пра тое, што праціўніку аддадзеныя велізарныя кавалкі, — заявіў Прыгожын.
Паводле яго словаў, УСУ рухаюцца ў бок Малочнага лімана, і калі выйдуць да яго, то «большасць тэрыторый, якія былі захопленыя падчас так званай СВА, будуць вернутыя праціўніку».
Прыгожын сцвярджае, што ўкраінскія вайскоўцы пачынаюць фарсіраваць Днепр, а ў Голай Прыстані з’яўляюцца не толькі ДРГ, але і рэгулярныя ўкраінскія войскі.
— І ўсё гэта хаваецца ад усіх. Расія прачнецца ў нейкі дзень і высветліць, што ўжо і Крым перададзены ўкраінцам. Ідзе прамая здрада інтарэсам Расійскай Федэрацыі, — сцвярджае Прыгожын.
Ён зноў заявіў, што ў расійскім войску не хапае боепрыпасаў і ўзбраення, сярод асабовага складу — вялікія страты. Падраздзяленні ўкамплектаваныя на 40−50%, заявіў Прыгожын.
Паводле яго, цаной спецаперацыі становіцца татальнае знішчэнне расійскай арміі, але кіраўніцтва займаецца «падтасоўкай фактаў» і дасылае ў Маскву «прыгожыя даклады», падманваючы «вярхоўнага галоўнакамандуючага» і «расійскі народ».
— Контрнаступленне УСУ нясе нам сур’ёзныя страты і праблемы, якія замоўчваюцца, — заявіў Прыгожын.
Нагадаем, прэзідэнт РФ Уладзімір Пуцін неаднаразова заяўляў, што ўкраінскія войскі падчас контрнаступлення нясуць вялікія страты і не маюць поспехаў ні на адным з напрамкаў.
— На ўчорашні вечар, дакладней на ноч сённяшнюю, — я ўжо не кажу пра страты асабовага складу, яны вельмі значныя, вельмі — нашыя мужыкі накалацілі 245 танкаў праціўніка і прыкладна 678 бронемашын рознага тыпу. Вядома, там ёсць і «Леапарды», і французская колавая бронетэхніка, амерыканскія бронемашыны — усё ёсць. Гараць за мілую душу, — заявіў сёння Пуцін.
