Украінская цяжкая тэхніка ўпершыню пераадолела расійскія ўмацаванні першай «лініі Суравікіна» ў раёне вёскі Вербавае ў Запарожскай вобласці. Пра гэта паведамляюць OSINT-аналітыкі, якія робяць выснову па апублікаваных відэа расійскіх атак па ўкраінскай цяжкай тэхніцы, піша «Агентство. Новости».
З відэа, якое геалакаваў твітар-акаўнт imi (m), вынікае, што цяжкая тэхніка ўпершыню пераадолела супрацьтранспартны роў і «зубы цмока» на гэтым кірунку, піша аналітык амерыканскага Інстытута па вывучэнні вайны (ISW) Джордж Барас. Як адзначае ваенны аналітык Роб Лі, абарончую лінію прайшлі браняваныя машыны Stryker, БМП Marder і БТР MaxxPro.
Барас адзначыў, што ўкраінская тэхніка на відэа, хутчэй за ўсё, ехала па прасёлкавай дарозе, якую, відаць, захавалі падчас будаўніцтва рова і пракладання лініі з «зубамі цмока». Гэта, імаверна, сведчыць пра тое, што УСУ маглі разграміць расійскую абарону на гэтым участку, дадае эксперт.
The Ukrainians in this video likely drove down a country road that creates a hole in the ditch and teeth lines at 35.9130713°E 47.4349185°N. It indicates that Ukrainian forces have likely defeated local Russians defense in this section of the line. pic.twitter.com/6Gkmgjcvs6
— George Barros (@georgewbarros) September 20, 2023
Прасоўванне ўкраінскай цяжкай тэхнікі ў гэтым раёне — значнае развіццё сітуацыі на фронце, адзначыў Роб Лі. Імаверна, украінскія сілы рыхтуюцца да новага наступу, лічыць Барас.
Украінскае камандаванне сканцэнтравала намаганні на прарыве абароны ў раёне Вербавага, піша і блізкі да расійскага Мінабароны тэлеграм-канал «Рыбарь». У той жа час прарасійскія тэлеграм-каналы WarGonzo і «Два майора» адзначаюць, што інтэнсіўнасць украінскіх атак ля Вербавага знізілася.
Карта праекта DeepState не фіксуе змяненняў у раёне Вербавага. Не гаворыцца пра гэта і ў апошнім дакладзе Інстытута па вывучэнні вайны.
Украінскія войскі ўпершыню пераадолелі абарончыя збудаванні ў раёне Вербавага ў канцы жніўня. У пачатку верасня УСУ ўдалося пашырыць пралом у расійскай абароне. Пры гэтым аналітыкі ISW тады падкрэслівалі, што не могуць казаць пра прарыў «лініі Суравікіна», бо ў гэтым раёне яшчэ не з’явілася ўкраінская цяжкая тэхніка.
«Лініі Суравікіна» — гэта абарончыя збудаванні, якія Расія ўзвяла на акупаваных тэрыторыях Украіны і ў памежных з Украінай расійскіх рэгіёнах.