Блізкаўсходняе агенцтва ААН для дапамогі палестынскім уцекачам (UNRWA), найбуйнейшая арганізацыя, якая займаецца гуманітарнымі праграмамі ў сектары Газа, страціла адразу некалькі крыніц фінансавання. Прычынай стала інфармацыя, што супрацоўнікі UNRWA ўдзельнічалі ў атацы ХАМАС супраць Ізраіля 7 кастрычніка 2023 года. Пра гэта піша Financial Times.
Адразу некалькі дзяржаваў заявілі, што прыпыняюць фінансаванне агенцтва ААН UNRWA. Гэта Вялікабрытанія, ЗША, Германія, Італія, Фінляндыя, Аўстралія і Канада. Цяпер у ААН праходзіць унутранае расследаванне, якое мусіць высветліць, ці былі датычныя некаторыя супрацоўнікі агенцтва да атакі на Ізраіль.
Генеральны сакратар ААН Антоніу Гутэрыш заявіў, што ў сувязі з гэтымі абвінавачаннямі дзевяць супрацоўнікаў агенцтва былі звольненыя. Яшчэ адзін падазраваны мёртвы, і асобы яшчэ дваіх цяпер высвятляюць. Антоніу Гутэрыш заклікаў дзяржавы не спыняць фінансаванне UNRWA, бо, паводле яго, ад гэтага залежыць выжыванне двух мільёнаў жыхароў сектара Газа.
UNRWA — агенцтва ААН, у якім працуе каля 30 тысяч чалавек, з іх у сектары Газа — 13 тысяч. Агенцтва займаецца гуманітарнай дапамогай, а таксама забяспечвае працу школ, бальніц і лагераў для палестынскіх уцекачоў. У школах, якія знаходзяцца пад кіраваннем UNRWA, цяпер размяшчаецца цывільнае насельніцтва, што спрабуе схавацца ад ізраільскай ваеннай аперацыі ў сектары Газа.
Былы амбасадар Ізраіля ў Вялікабрытаніі Марк Рэгеў заявіў BBC, што настаўнікі ў школах, якія кантралюе UNRWA, адкрыта святкавалі момант атакі ХАМАС на Ізраіль. Таксама, з ягоных словаў, адзін з закладнікаў ХАМАС пасля вызвалення расказаў, што яго трымалі ў доме супрацоўніка UNRWA.
Нарвегія вырашыла не спыняць фінансаванне агенцтва ААН. Генеральны камісар Unwra Філіп Ладзарыні таксама заклікаў краіны, якія спынілі фінансаванне, змяніць сваё рашэнне.